Evnið í ár er burturkast og endurnýtsla, og hetta sæst aftur í skránni, sum umfatar kjakfund um burturkast, skiljing og endurnýtslu, eina framsýning úr ruski og eina útikonsert, har áhoyrarar eru vælkomnir at taka lut við heimagjørdum endurnýtsluljóðførum.

Slóða fyri er nýggja heitið á umhvørvisvikuni í Klaksvík, og endamálið er at eggja borgarum í Klaksvíkar kommunu at ganga á odda í umhvørvismálum. Átakið byrjar við grønari guðstænastu í Christianskirkjuni sunnudagin kl. 11.00, og heldur fram til leygardagin, tá ið hjólvelting, plantutiltak o.a. er á skránni.  

Mikukvøldið verður kjakfundur um burturkast, skiljing og endurnýtslu í Spaniastovu. Luttakarar verða umboð frá Endurnýtsluni í Klaksvík, Ringrás, IRF og Klaksvíkar kommunu, umframt landsstýriskvinnuna í umhvørvismálum. Orðstýrari verður Ragnheiður Bogadóttir frá Fróðskaparsetri Føroya. Kjakið fer at taka útgangsstøði í Vit og skil í eina viku, eitt átak har fýra borgarar í kommununi royndu seg við at skilja alt húsarhaldsrusk í eina viku (sí meira um tiltakið á facebooksíðuni Slóða fyri).

Um veðrið er til vildar, verður útikonsert uttan fyri kunningarstovuna fríggjamorgunin, har næmingar á Skúlatrøð og Rakul Ró framføra umhvørvissangin Vit og skil og aðrar barnasangir. Barnagarðar taka eisini lut og áhoyrarar eru vælkomnir at lata seg í endurnýtsluklæði og ikki minst at hava egin endurnýtsluljóðføri við.

Øll skráin sæst við at trýsta her.