Tíðindi
Myndin hjá Carl Jóhan Kjølbro varð kosin vinnari av myndakapping hjá Klaksvíkar kommunu í heyst, og í dag handaði borgarstjórin vinnaranum fyrsta kortið.
Í heyst skipaði Klaksvíkar kommuna fyri myndakapping, har øll kundu senda inn teirra lýsing av Klaksvík í eini mynd. Millum tær 59 innkomnu myndirnar varð tann hjá Carl Jóhan kosin vinnari, og í dag handaði Jógvan Skorheim, borgarstjóri Carl Jóhan fyrsta kortið.
Í samband við, at vinnandi myndin varð kosin og kunngjørd, segði borgarstjórin soleiðis um myndina:
- Umframt at vera vøkur í litum, uppseting og motivi, so fortelur myndin søguna um sambandið millum sjógv og land, vinnu og bý. Harumframt sæst sólin rísa upp yvir býin og ljós verður varpað á nýggja miðbýarøkið, sum eisini er við til at menna samleikan hjá kommununi.
Sjálvur hevði Carl Jóhan ikki væntað at vunnið kappingina. Myndina tók hann á veg á trygdarskeið hjá Sjónámi í november í fjør.
- Hatta var ein avbera vakur morgun, so eg helt hatta vera eina stuttliga mynd at taka á kajini, og eg kom beinaveg í tankar um hasa myndina, tá ið eg las um kappingina, men eg hevði slett ikki væntað at vinna, segði Carl Jóhan Kjølbro.