Norðurljós

Norðurljós

Norðurljós er tiltak, har ljós verður varpað á list og mentan í Klaksvíkar kommunu.

Hæddarpunktið er handanin av Listarvirðisløn Nólsoyar Páls, sum er virðisløn á 75.000 kr til eitt lokalt listafólk, sum á ein hvønn hátt skarar framúr. 

Norðurljós 2018 verður 25. - 28. januar, og niðanfyri ber til at lesa um nakað av tí, sum er á skránni.

 

Hósdag 25. januar

Kl. 17: Stearinljós workshop v/ Elini Lindenskov

Kl. 20: Bókacafé á Bókasavninum v/ Steintóri Rasmussen

 

Fríggjadag 26. januar

Kl. 21: Fyrilestur í Atlantis

Hvønn týdning hevur ljós fyri menniskjað?

Hetta er evnið á fyrilestri hjá Jóhonnu Andreassen í Atlantis fríggjakvøldið.

Fyrilesturin er ókeypis.

 

Leygardag 27. januar

Kl. 10.00: Mentanarmorguntúrur við ferðaleiðara

Dagurin kann valla byrja betri enn við einum frískum gongutúri, og í samband við Norðurljós er upplagt at leggja morguntúrin til rættis sum eina mentanarrundferð í býnum. Sum savnsleiðari, trompetistur og garvaður frásøgumaður er Andras Sólstein sum skaptur at ganga fremst á túrinum, sum millum annað leggur leiðina framvið gamla býlinginum í Vági og Spinnarínum.

Túrurin byrjar við garðin hjá Nólsoyar Páll á Biskupsstøð kl. 10 og er ókeypis. Øll eru vælkomin.

 

Kl. 14.00: Málningalist á uppboðssølu

Nú Posthúsið í framtíðini verður mentanarmiðdepil í Klaksvík, sleppur kjallarin venja seg við angan av máling og mentan. Nøkur av Føroya fremstu listafólkum hava nevniliga latið málningar til uppboðssølu til frama fyri mentanarhús-verkætlanina.

Innkomni peningurin fer til grunnin Mentanarhúsið, og harvið gevur tiltakið tær ein forkunnugan møguleika fyri at stuðla verkætlanini saman við listafólkunum við at keypa list í heimsflokki!

Uppboðssølan verður í Posthúskjallaranum, og øll eru vælkomin.

 

Kl. 17.00: Ljósgonga gjøgnum býin

Finnið ljóssvørðini, lummalyktirnar og sjálvlýsandi oyralokkarnar fram!

Leygardagin fara vit at lýsa býin upp við at ganga ljósgongu frá Býráðshúsinum á Nólsoyar Pálsgøtu 32 til Posthúsið. Har fara vit saman at gera og avdúka eitt listaverk, og hita okkum við grýturætti frá Gepetto.

Tiltakið er ókeypis og øll eru vælkomin - minnist til at hava ljós við.

 

Kl. 20.00: Listavirðisløn Nólsoyar Páls verður handað

Reyði leyparin verður rullaður út í Atlantis leygarkvøldið, tá Listavirðisløn Nólsoyar Páls verður handað lokalum listafólki, ið skarar framúr og hevur stóra viðurkenning uppiborna.

Kvøldið og pallurin eru ognað vinnaranum, sum tó ikki verður avdúkaður, fyrr enn áskoðararnir eru væl og virðiligar undirhildnir og upphitaðir til stóru avdúkingina.

Tiltakið er ókeypis, men vegna avmarkað pláss er neyðugt at bíleggja atgongumerki á www.atgongumerki.fo. Til ber at bíleggja atgongumerki frá mikudegi 24. januar kl. 16.

 

Sunnudag 28. januar

Kl.16.00: Konsert í Atlantis

Høvdingar hittast sanniliga á palli, tá Hans Andrias Jacobsen og Hallur Joensen fara at tulka og framføra sangir hjá hvørjum øðrum.

Atgongumerkini kosta 275,- og kunnu keypast á www.atgongumerki.fo frá mikudegi 24. januar kl.16.

Skráin fyri Norðurljós

Listavirðisløn Nólsoyar Páls

Listavirðisløn Nólsoyar Páls er virðisløn, ið verður latin einum ella fleiri persónum, sum eru virknir og hava framt dygdargóð avrik innan list í Norðoyggjum. Hanus G. Johansen, Edward Fuglø og Eyð Matras hava áður fingið virðislønina, og í ár verður virðislønin handað leygarkvøldið 27. januar í samband við Norðurljós.

Málningalist á uppboðssølu

Norðurljós snýr seg um list og mentan í breiðasta týdningi, og fleiri av tiltøkunum á skránni eru rættiliga forvitnislig og forkunnung. Eitt nú verður uppboðssøla av málningum í Posthúskjallaranum, har nøkur av okkara allarfremstu listafólkum hava latið málningar til frama fyri nýggja mentanarhúsið í Posthúsinum. Uppboðssølan verður í Posthúskjallaranum leygardagin 27. januar, og allur vinningur av søluni fer til nýggja mentanarhúsið.

Konsert í Atlantis

Sunnudagin 28. januar verður ein heldur øðrvísi konsert í Atlantis, har tveir høvdingar hittast á palli. Hans Andrias Jacobsen og Hallur Joensen hava á hvør sín hátt gjørt seg galdandi sum framúrskarandi tónleikarar, og á konsertini sunnudagin fara teir báðir at tulka og framføra sangir hjá hvørjum øðrum.